शैक्षणिक नवोपक्रम : गोष्ट आपल्या मातीची.
धरणगाव तालुक्यातील शेरी गाव भेंडीसाठी प्रसिद्ध आहे. गावातील शेतकऱ्यांनी आपले जीवनमान उंचावण्यासाठी आणि आपल्या मेहनतीच्या जोरावर भेंडीच्या शेतीत उल्लेखनीय यश मिळवले आहे. या पार्श्वभूमीवर शेरी गावातील जिल्हा परिषद उच्च प्राथमिक शाळेत भेंडी परिषदेचे आयोजन करण्यात आले.
आयोजनामागील हेतू
या परिषदेचा उद्देश विद्यार्थ्यांना आपल्या गावातील मुख्य पीक असणाऱ्या भेंडीविषयी माहिती देणे व घेणे असा होता. मुलांना शालेय शिक्षणासोबतच व्यवसाय शिक्षणाचे महत्त्व समजावे आणि आपल्या मातीशी असलेले नाते अधिक घट्ट व्हावे, यासाठी ही परिषद आयोजित करण्यात आली होती.शेतकऱ्याचे कष्ट आणि शिकवण परिषदेत विद्यार्थ्यांना सांगण्यात आले की, पंख्याच्या वा एसीच्या हवेत बसून काम करणाऱ्याला आपण त्याच्या श्रमाचा मोबदला पगार म्हणून देतो. एखाद्या ठिकाणी भाषण करणाऱ्याला मानधन देतो. पण आपल्या घाम गाळून, शेतात उन्हात काम करणाऱ्या शेतकऱ्याला आणि शेतमजुराला मात्र मजुरी देतो. हा विचार विद्यार्थ्यांच्या मनाला भिडणारा ठरला.
आपल्या गावाचा अभिमान
शेरी गावातील शेतकऱ्यांनी भेंडी पिकवून गावाचे नाव देशभरात पोहोचवले आहे. अधिकाधिक उत्पादन घेण्यासाठी शेतकरी राजा आपल्या कौशल्याने, श्रमाने आणि विज्ञानाधारित पद्धतींनी शेती करतो. ही जिद्द व चिकाटी विद्यार्थ्यांसाठी आदर्श ठरते.
संविधानाचा संदेश
परिषदेत भारतीय राज्यघटना आणि प्रस्तावनेतील प्रत्येक व्यक्तीच्या प्रतिष्ठेची काळजी घेतली पाहिजे हा संदेशही विद्यार्थ्यांना देण्यात आला. शेतकरी व शेतमजुरांच्या श्रमाला मान द्यावा, त्यांचा सन्मान राखावा, हे विद्यार्थ्यांच्या मनात दृढ करण्यात आले.
निष्कर्ष
‘भेंडी परिषद’ या उपक्रमातून विद्यार्थ्यांना शालेय शिक्षणाबरोबरच जीवनशिक्षण मिळाले. आपल्या गावाच्या मुख्य पिकाविषयी अभिमान वाटला आणि श्रमाचे महत्त्व कळले. मातीशी जोडलेली गोष्ट मुलांच्या मनात घर करून गेली.
No comments:
Post a Comment